叉足電，又要出動啦！ 未食早餐之前，要先去附近一間大型電器舖，尋找兩位男仕們一早鎖定的目標 - PSP！ 結果嘛，原來連日本都咁好賣，冇貨啊！失望死小圓山啊～

既然冇得賣就拿拿聲走啦～～要食早餐架～ 附近有間幾靚咁０既CAFE喎．．．．

滿足晒～大踏步去撘JR出原宿啦。 乜個路線圖咁複雜架？仲要分埋黎緊呢班車係特快定特急咁，咁麻煩架．．．．我唔理，我影相架０者～有人遞埋飛俾我就得架啦～呵呵呵．．．．

轟轟轟．．．日本的車廂裏面，係冇人講野架～～０薯～～～（不過嘴仔唔停０既馬仔同毛毛又點忍到呀，佢地較低左幾十個分貝的笑聲都好勁架！） 好鐘意架車囉，ｄ凳係暖架～下面有暖氣滲出大脾位度，呼～用黎暖手好爽啊！ 好快，就到左原宿站啦。一上路面，不得了不得了！站對面正正就有間好大好靚０既SNOOPY TOWN  呀～嘩嘩嘩．．．．．

擾攘完一輪，掃走幾隻狗咁，就正式開始原宿SHOPPING之路啦～ 途經一間漫畫店，超大間。馬仔一個箭步就拎出預先印好的「奇面組」公仔（呢，即我以前話問極都冇人睇過，但係我勁鐘意個套卡通呢），捉住售貨員手指指一輪，終於．．．． 有呀有呀！仲係好多本呀！仲有DVD賣呀！唔知係隻眼真係太大，定係我開心到神智不清，見到盒DVD寫住26xxYen就發左癲咁，到想去俾錢時，先發覺睇少左個零。即係成二萬幾Yen呀！！！！嘩～成二千蚊港紙呀！！！！！！嘩嘩嘩！買到成個巴巴利袋啦．．．．冇辦法，唯有放低，轉戰港紙廿蚊本的漫畫算罷啦．．．嗚嗚嗚．．．．

反轉完間COMME CA後，就進入竹下通一條出名多野賣的街啦～ 有點似旺角FEEL囉，都幾多野睇架。不過馬仔冇買野，而毛毛就因為俾化粧小姐的靚粧吸引住，買左PN新色的眼影啊～～勁抵呢！！！（後來晚上我都買番一模一樣，仲打後搽足咁多日添喎～～YEAH~)

繼續行～繼續買～繼續嗌～

夠鐘啦夠鐘啦～開飯啦開飯啦～ 附近唔係太多食肆，揀左間算叫做平的餐廳，一個餐 1300 Yen。地方幾骨緻架，唔好睇舖仔細細，個 toliet 仲大過你間房呀～仲好乾淨好香添，晌日本真係絕對唔需要擔心 toilet 唔乾淨啊。 唯一唔好處就係好多地方都有人食煙，呀．．．好辛苦呢～

食飽囉喎！黎料喇喎！去買貴野啦～ 先去左巴巴利 BLUE LABEL，不過冇野０岩呀，Ｄ袋款麻麻。咁就去 BLACK LABEL 啦，間舖好型呀！連Ｄ SALES 都好型呀，不過Ｄ衫好細件囉，大碼都係好細咁。

到我地啦到我地啦～同型仔 SALES 問左路後，就行去涉谷 OIO CITY 度睇 AGNES B 啦！Ｄ款同香港差唔多喎，不過有個幾平又０岩媽媽用手袋，好，扑槌～而一路領先緊０既參賽者毛毛就買到個奄烈袋（我都有睇中另一款呀～～點解我唔買呀～～～天呀～～地呀～～）。 返去新宿伊世丹，毛毛又再買多個Ｂ仔袋呀。叮～呢個回合，你又贏左啦！

據講日本求其搵間平價迴轉壽司都好食過香港多聲，今晚就晌新宿食間平野試下先！ 果然真係不賴呀！起碼唔會好似香港咁成舊凍冰冰，好好味呀！

食飽就要返去啦，因為聽日要好早起身呢。 經過百果園，都係要食多串士多啤梨飯後果先～YUM YUM! 今晚街頭上，有好幾組人在表演唱歌呀，佢地仲係每人都有自己 CD 賣架，而且封面影得一Ｄ都唔馬虎，好鬼型架！

好似買左好多野咁喎，等我同佢地影下相先！