又係圓山日啦～～～祝佢生日快樂啦～祝佢女朋友青春長駐，同埋佢快ｄ由小圓山變成大靠山啦～～哈哈哈.......

隻馬之前病左太多假，所以唔可以再請假啦，唯有只係同佢食餐飯就算啦～多得網友BB Duck介紹，我地有機會去蘇豪試下法國菜啦～

味道好好味呀，雖然地方唔太大，但係小圓山好鐘意呀，佢好開心我唔係帶佢食ｄ行貨野喎（衰得佢呀.....）。

好豪咁嗌左個五百幾蚊０既二人餐，包：頭盤－BB青口，三文魚沙律，濃味蝦湯，煎鵝肝，主菜－大大塊牛扒，龍蝦意粉，甜品有燉旦同朱古力布甸，但係餐廳好細心，我只係訂位時講過一次話想甜品時要支生日蠟燭，去到都冇再提，佢就己經幫我將朱古力布甸改做心太軟旦糕兼插埋蠟燭啦～（雖然，雖然我覺得個旦糕非常唔好味...... :P）

食完飯，懶叻０既馬就呃小圓山話買左飛去睇戲，實情係毛毛同小Con己經晌卡拉OK度開左房啦～kekekekekekeke..... 黎啦，截架的士先啦～

路痴馬：「司機，唔該灣仔天樂里呀～」
壽星山：「咦，又話去睇戲？」
路痴馬：「（沾沾自喜）唏～你唔好理住啦～」
司機乙：「咁係由XXXX咁去呀，定係經XXXXXX咁去呢？」（唔鬼記得佢講ｄ街名啦！）
路痴馬：「呀．．．．是但啦．．我淨係想去天樂里．．」
司機乙：「咁你係想去天樂里０既XXXX度落呀，定係XXXXXX呢？」
路痴馬：「我．．．我想晌天樂里．．．呢．．．個電車轉角位呢．．．．」
司機乙：「即係？」
路痴馬：「（額頭己變黑加三間）我想，我想晌間卡拉OK門口落。」
司機乙：「哦～你想去Neway呀！」
路痴馬：「係..............................................(妖！）」
司機乙：「咁但係你係想由XXXX咁去呀，定係經XXXXXX咁去呢？」 （夠啦！！！你問咁多架！你點做的士司機架！！我唔理呀！我淨係要去Neway呀！）

最後，由不停陰陰咀笑０既壽星山同司機溝通。

哼～～～～

飲食情報：Brasserie Le Fauchon, 中環蘇豪伊利近街45號地下 , 電話: 2526-8318
*餐廳有煙花蠟燭供應架，不過因為我冇一早講明，同埋可能見我又唔係大旦糕，所以冇俾煙花蠟燭我啊．．．