Exclesior

我地擺酒嘅地方係銅鑼灣怡東酒店三樓海景廳。

因為我地都係住港島區，又想揀返間近親戚朋友，所以銅鑼灣係最理想嘅選擇，加上樓下咁多街行，最方便來賓影完相又走落街行陣，開席先返上黎~(哈，我幾為大家設想!)

其實Exclesior個場唔係太大，擺25圍度真係已經好盡，樓底亦唔係高，個stage亦係好細，要影超多人大合照，真係勁考攝影師~不過要啱價錢啱地點，始終選擇唔多，所以呢度對我地黎講算係唔錯。

至於野食方面，我就未聽過有人同我投訴話唔好食（咁就算有亦未必會同我講，哈~)，不過馬媽媽同馬爸爸都話OK，咁最緊都係老人家話ok啫，我地後生求其咪得囉，kekekekeke~~

整體黎講service都唔錯，我晌台上面睇住佢台下面長期有人企晌度等候，一話斟茶就即刻有人準備好，又會幫客人拎住手袋，見我一有空檔又會即刻俾水我飲，服務都OK。

呀，仲有，佢個新娘房超大，因為其實係用左一個細function room黎做，但係因為間方咁大反而勁方便，成班姊妹可以坐晒入去一齊set頭化粧，又可以一齊開餐食壽司同睇電腦，勁正~ 不過新娘要用洗手間就要走出去同客人用同一個，但係，我個晚好似係完全冇去過囉，哈。

另外佢會送一晚客房，包一個送上房嘅早餐（超正呀!），而我亦另外加左$4xxx book左早一晚嘅套房做出門用，間房都幾大架，有睡房有客廳，仲對住維港，夜晚熄晒燈睇超超超靚！